“АК Films” студийн уран бүтээлчид “Сайхан амьдралын төлөө” нэртэй кино хийжээ. Уг кинонд БНСУ-д ажиллаж, амьдарч буй монголчуудын тухай өгүүлэх аж. Энэ талаар “АК Films” студийн найруулагч н.Лхагвадоржоос сонирхлоо.

-Шинэ уран бү­тээ­лийнхээ талаар сонирхуулаач?

-Энэ кинонд Өмнөд Солонгост амьдарч байгаа монголчууд хүний нутагт хүнд хэцүү нөхцөлд амьдарч,  хэрхэн ажиллаж байгааг харуу­лахыг зорьсон юм.

-Бодит амьдралаас сэдэвлэн бичсэн кино л доо. Монгол, Солон­госын уран бүтээлчид хамтарч ажил­ласан. Кино зохиолыг СУИС-ийн жүжигчин найруулагчийн анги төгс­сөн Ш.Равдандорж гэдэг залуу бичсэн. Кино маань нэг цаг 40 минут үргэл­жилнэ.

-Зураг авалтаа хаана хийсэн бэ?

-Солонгост хоёр жил, Өвөр­хангай аймагт гурван сарын хугацаанд зураг авалт хийсэн. БНСУ-д зураг авахад олон хүндрэл гарч байсан. Жишээ нь, үйлдвэрт, онгоц­ны буудал дээр зураг авахад хам­гаалагчаас нь эхлээд дарга цэргээс нь хүртэл зөвшөөрөл авна гэхчлэн цаг хугацаа, мөнгө санхүүгийн асуу­далтай тулгарч байсан. Гэхдээ тэнд ажиллаж байгаа монголчууд их туслалцаа үзүүлсэн. Өмнөд Солон­гост ажиллаж байгаа манай монгол­чууд долоо хоногийн зургаан өдөр нь ажилтай, зав бага­тай байдаг мөрт­лөө ганц өдрийн амралтаараа бидэн дээр ирж, өөрсдөө хандивын хайр­цаг хүртэл нээж, сэтгэлзүйн дэмжлэг өгдөг байсан. Тийм ч учраас маш олон хүний сэтгэл шингэсэн сайхан кино болсон гэдэгт итгэлтэй байна.

-Киноны дууг хэн дуулсан бэ?

-”Нөлөө” гэж хамтлаг дуулсан. Сүүлийн үед телевиз, FM-ээр манай киноны дуу нилээд цацагдаж байгаа. “Гэр рүүгээ” гэдэг дуу байгаа. Мар­гааш­наас /Өнөөдөр/ киноныхоо бүтэн нэрээр ца­цаг­­дана. Ерөнхийдөө клип­ний зу­раг авалтыг Өмнөд Соло­н­гост авсан.

-Танай студи өмнө нь кино зохиол дээр ажил­лаж байсан уу?

-Энэ кино манай сту­дийн хамгийн анхны бүтээл. Кино­ныхоо нээлтийг хийчихээд дараагийн уран бүтээлийн зураг авалтдаа ирэх оны нэгдүгээр сараас орохоор төлөв­лөж байна. Тэр бүтээл нь “Би эргэж ирэхгүй” гэсэн нэртэй Есүс христийн тухай кино бай­гаа. Гэхдээ бид ямар нэгэн шашин сурталчлах зорилгоор энэ киног хийх гээгүй гэдгийг ойлгоо­рой. Гол нь  бидний шүтдэг тэр бурхан газар дээр ирж, хүний ёсоор бидний дунд орж амьдарвал ямар байх вэ? гэсэн агуулгаар киногоо бүтээнэ.  

-Таныг Joni гэдэг нэрээр хү­мүүс  илүү сайн таних байх. Өөрийн­хөө талаар манай ун­шигч­дад товч танил­цуу­лаач?

-Би Төв аймгийн Бор­нуурын сангийн аж ахуйд төрсөн. СУИС төгссөн. Жү­жиг­чин, най­руу­лагч мэр­гэжилтэй. Сурал­цаж байх хугацаандаа “Оргод­лын паян” гэдэг хүүхдийн ки­нонд, “Хүн хөрөө” киноны гол дүрд тоглож байсан. Харин сур­гуулиа төгсөөд “Өнгөт инээд”, “Маск” продакшнд ажиллаж байлаа. Мөн дуучин Т.Ариунаа, “Киви” хамтлаг, “Камертон” хамт­лагийн дуучин Мээдээтэй хам­тарч ажил­лаж байсан. Энэ жилээс “АК Films” студи байгуулж, үндсэн мэргэ­жил болох найруулагчийнхаа ажлыг хийж байна.

-”Сайхан амьдралын төлөө” киноныхоо нээлтийг хэзээ хийхээр төлөвлөж байгаа вэ?

-Уг нь кино бэлэн болчихсон бай­гаа. Гэхдээ өндөржүүлсэн бэлэн бай­дал зарласан учраас тодорхойгүй хугацаагаар нээлтийнхээ өдрийг хойш­луулсан. Бид нар киноныхоо нээлтийг Улаанбаатарт  биш орон нутагт хийдэг юм уу гэж бодож байгаа. Баян­хонгорт. Яагаад гэвэл шинэ киноны нээлт ихэвчлэн Улаанбаатарт болдог. Бид эс­рэ­гээрээ эхлээд 21 аймагт киногоо гаргах байх. Харин БНСУ-д бол кино­ны­хоо нээлтийг хийж, тэнд ажиллаж, амьдарч байгаа мо­н­гол­чууддаа хүргэ­сэн байгаа.

Ц.Дэлгэрмаа

Сэтгэгдэлүүд (2)