| Алдарт Карнеги холлд монгол дуучин дуулна | ||||
|
| Хөгжим | |
 Дэлхийн сонгодог урлагийн хамгийн нэр хүндтэй тайзын нэг, уран бүтээлч бүхний гарахыг хүсдэг алдарт Карнеги холлд монгол дуучин дуулах гэж байна. Ингэхдээ томхон концертын зүгээр нэг номер төдий бус бие даасан тоглолтоо хийх гэж байгаа нь бахархууштай. Монгол Улсын Соөлын тэргүүний ажилтан, ДБЭТ-ын гоцлол дуучин Эрдэнэбатын Саран АНУ-д тун амжилттай яваа уран бүтээлч. Тэрбээр ирэх гуравдугаар сарын 6-нд төгөлдөр хуурч Сюзан Риччи Рожелийн хамтаар Карнеги холлд бүтэн тоглолтоо толилуулах гэж байна. Э. Саран Беллини, Верди, Пуччини, Римский Корсаков, Дворжак, Рахманинов нарын сонгодгуудаас мөн Билэгжаргал, Шарав, Жанцанноров, Баттөмөр нарын монгол хөгжмийн зохиолчдынхоо бүтээлээс ч дуулж Америкийн сонгодог урлаг бишрэгч олны сонорыг мялаана. Урьд нь Монгол Улсаас төгөлдөр хуурч Сангидоржийн Саянцэцэг Карнеги холлд бүрэн тоглолт хийж байсан бөгөөд дуучдын хувьд Э.Саран анхных нь болж байгаа юм. Дуучны www.saranerdene.com вэб сайтаар зочилж түүний дуулсан Италийн нэрт хөгжмийн зохиолч Пуччинийн “Эрвээхэй хатан” дуурийн Чио Чио саны дүрийн хэсгээс сонирхоорой.
Сэтгэгдэлүүд (3)
 Сэтгэгдэл бичих
|
